Закон за прекинување на бременоста: Сама одлучуваш бидејќи најдобро знаеш!

Во мај 2019 година се донесе новиот Закон за прекинување на бременоста за кој 6 години активно се залагавме. Сè уште жалиме за штетите кои ги причини претходниот закон (2013) за женските права и здравје и едновремено се надеваме дека никогаш повеќе нема да се вратиме чекор наназад кон груба злоупотреба на правото и навредување на интегритетот и достоинството на жената како човечко битие.

Зад себе ги оставаме сложените административни процедури кои жената требаше да ги помине во болницата во која побарала абортус, задолжителното чекање од 3 дена по советувањето од лекарот кое беше наведувачко и имаше за цел да ја предомисли жената од абортусот, наведувајќи и чувство на вина за нејзината одлука. Повеќе не постои ниту комисија која одлучува што е најдобро за жената во периодот од 12-22 гестациска недела. Дополнително, се воведува медикаментозен абортус кој, освен хируршкиот метод, ќе биде уште една опција во раната бременост.

Сега, секоја жена слободно одлучува дали продолжувањето на бременоста е вистинската опција за неа. Со Новиот закон за прекинување на бременоста:

  • Се укинува задолжителното пристрасно советување. Ќе бидете советувани за текот на процедурата и очекувањата потоа, од медицински аспект и само доколку сакате. Ако сметате дека немате потреба од било какви информации поврзани со абортусот, слободно одбијте ги. Советувањето повеќе не е услов за извршување на абортусот.
  • Се укинува тридневното чекање по советувањето. Одлуката за абортусот не е лесна, а дополнително ќе се отежни доколку чекате во неизвесност. Очекувајте абортусот да се изврши без одложување. Никој нема право од вас да бара истек на рок.
  • Не треба да го докажувате својот социјален статус за да можете да абортирате – доволна ќе биде вашата лична изјава за социјалната состојба. Доколку сте се одлучиле на абортус поради социјално-економски причини, немате обврска да прибирате документи за да го докажете својот статус.
  • Во случај на силување, обљуба врз немоќно лице, полов напад врз дете, обљуба со злоупотреба на положбата или родосквернавање, не треба да прибирате документи од МВР и ОЈО за да го докажете делото. Доволна е вашата изјава за абортусот да се изврши.
  • Се укинува првостепената комисија во болниците за одлучување за абортус меѓу 12. и 22. недела од бременоста. Повеќе нема да морате да чекате најмалку 7 дена пред да ви биде одобрено барањето за абортус од комисијата, а болницата ќе треба да ви ја даде услугата за најмногу 3 дена. Крајната одлука е ваша, без оглед на мислењето на гинекологот кај кого сте се обратиле за абортус или на мислењето од вториот специјалист, кое гинекологот може да го побара. Болницата е должна да го изврши абортусот доколку тоа е вашата одлука.
  • Абортусот до 9. недела од бременоста ќе може да се изведува со соодветни лекови и во гинеколошките ординации. Освен во болниците, абортусот ќе биде дозволен и во гинеколошките ординации кадешто ќе се врши со помош на лекови и под наздор од гинекологот, со што оваа услуга ќе стане попристапна за сите.

За дополнителни информации поврзани со постапката за прекинување н бременост, ви стоиме на располагање. Контактирајте не преку:

Телефон:  +389 (0)2 3290 395; е-пошта:  hera@hera.org.mk

[1] Текстот се однесува на Законот за прекинување на бременоста кој стапи на сила на 30-ти мај 2019 година (Сл. Весник на СРМ бр. 101/19 од 22.05.2019 година).

За авторката:
Росана Богатинова, правна советничка и проектна координаторка во ХЕРА – Асоцијација за здравствена едукација и истражување

Актуелно

Без разлика на условите за живот, на доктор мора да се оди

Фустанче подарено од луѓе чии деца не го носат. „Не ново но е чисто, го исправ за кај доктор Снеже биде чисто детето“, раскажува Фатмира. Во овој дел од населбата Шуто Оризари граѓаните немаат вода, земаат од кај соседите, а многу често немаат ниту за перење ниту за бањање.

За Фатмира најголема среќа е што по цели три децении живот, таа пред четри години добила матичен број, а најмалото од четирите деца треба деновиве да добие извод.  Многу значи што има разбирање кај докторите и детето кога и да има здравствен проблем го прегледуваат. Малата Хасрет со мајка и заминаа во здравствениот дом. Патот прашлив, под силното сонце уште потежок. Пеш имаат десетина минути.

Видео прилогот е изработен во рамки на проектот „Промена на негативниот наратив кон Ромите во здравствените установи” финансиран од Фондација Отворено општество – Македонија.