Стрип „Приказни од амбулантата“ #3 (Втора сезона)
По неколку часа со неподносливи болки ме качија на бокс, дојде докторот и рече дека ќе се пораѓам сега и си замина. Останав со две сестри или не знам што беа. Едната од нив ми рече: „Ајде ти си петторотка, ти можеш сама да се пораѓаш“. И си замина. Втората сестра исто ме остави сама и ми рече „Ајде пораѓај се, мене ми завршува смената, ќе те оставам. Ти си родила 4 деца, за ова не изводи толку, не викај!“ и си замина.
Откако го испи кафето и цигарата првата сестра (ја гледав од спроти од стаклото) дојде и ми рече: „Што се дереш ма толку, срам да ти е, како знаеш да направиш 5 деца, вие Циганите за тоа ве бива! Вие Циганите само сте учени да раѓате“. Дојде и втората сестра и породувањето почна, а јас веќе немав сила и најверојатно од инекцијата бев зашеметена. Тие двете сестри цело време ме навредуваа и ми забележуваа за моето викање и само во еден момент едната од нив ме удри со ШЛАКАНИЦА. „Зошто ме удираш?“ ù реков и ми возврати со уште една шлаканица втората сестра: ,,Затоа што се дереш како крава“.
Оваа вистинска приказна, добиена од страна на жена од Шуто Оризари, беше објавена во 2016-та година. Родилките Ромки често се соочуваат со дискриминација во здравствените институции.
Да ја прекинеме оваа практика, сите граѓан(к)и заслужуваат достоинствен и еднаков третман!
